John Christensen frá Tax Justice Network væntanlegur til Íslands

Tax Justice Network (Samtök um réttláta skatta) er hópur fræðimanna og aðgerðasinna sem vinnur að rannsóknum á skattkerfum og að því að benda á misfellur svo sem skattsvik, skattaskjól og alþjóðleg undirboð skatta, oft af hálfu smáríkja. Slík fyrirbæri spilla að áliti samtakanna tilraunum þjóðríkja til að skattleggja þegna sína með réttlátum hætti. Þau valda líka truflunum á markaðshagkerfinu með því að umbuna fjármálastarfsemi óábyrgra fjárfesta og með því að beina fjárfestingum á vafasamar brautir. Orðið réttlæti er haft í nafni samtakanna vegna þess að þeim er umuhugað um að beita skattalagningu á vegum félagslegs réttlætis.

Von er á formanni ritararáðs samtakanna, hagfræðingnum John Christensen, í heimsókn til landsins. Christensen starfar í London og hefur m.a. fjallað um hvernig skattaskjólum og undanskotum skatta hefur verið beitt við arðrán í þriðja heiminum, sérstaklega í Afríku og Suður-Ameríku. Að hans sögn hefur fjármagnsflæði frá Afríku numið 600 milljörðum dollara síðan um 1980. Hluti af skýringunni felst í spillingu sem vestrænar stofnanir, t.d. bankar í ríkjum sem bjóða upp á bankaleynd (Liechtenstein, Sviss, Delaware í Bandaríkjunum og önnur aflandssvæði) standa fyrir. Slík spilling er sjaldnast kölluð slíku nafni en er að sögn Christensens jafn slæm og það sem venjulega er kallað slíku nafni.

Fundur verður með Christensen á miðvikudagskvöld, staðsetning nánar auglýst síðar.